కేరళకు చెందిన సంజూ శాంసన్ చాలా త్వరగా గుర్తింపు తెచ్చుకున్నాడు. వికెట్ కీపర్ బ్యాటర్‌గా టీమిండియాలోకి వచ్చాడు.. IPLలో తనదైన ప్రదర్శనతో ఏకంగా రాజస్థాన్‌కు కెప్టెన్‌గా మారి జట్టును నడిపిస్తున్నాడు.
సంజూ భారత్ తరఫున 11 వన్డేలు ఆడి 104 స్ట్రైక్‌రేటుతో 330 పరుగులు చేశాడు. ఇందులో రెండు అర్థ సెంచరీలు ఉన్నాయి. టీ-20లోనూ 16 మ్యాచుల్లో 135.16 స్ట్రైక్ రేట్ తో 296 పరుగులు సాధించాడు. ఐపీఎల్ కెరీర్ లో 138 మ్యాచుల్లో 3526 పరుగులు చేశాడు.
టీ-20 ప్రపంచకప్ కు జట్టును ఎంపిక చేసినప్పటి నుంచి సంజూ శాంసన్ వివాదం నడుస్తోంది. ఒంటి చేత్తో మ్యాచ్‌ను మలుపు తిప్పే సత్తా ఉన్న అతడిని తీసుకోకపోవటంపై క్రికెట్ అభిమానులు తప్పుబట్టారు.
అభిమానులు, విశ్లేషకుల నుంచి నిరసనలు వెల్లువెత్తున్న వేళ ఎట్టకేలకు సంజూని న్యూజిలాండ్‌తో టీ-20 , వన్డే సిరీస్‌లకు ఎంపిక చేశారు.
కివీస్‌తో సిరీస్‌లకు ఎంపిక చేసినప్పటికీ సంజూ శాంసన్‌కు టీ-20 మ్యాచ్‌లలో తుది జట్టుకు ఎంపిక చేయలేదు. ఆడిన మూడు మ్యాచుల్లో ఒకటి వర్షార్పణం కాగా మిగతా రెండింట్లోనూ అతడిని బెంచ్‌కే పరిమితం చేశారు.
ఎట్టకేలకు మెుదటి వన్డేలో సంజూకి అవకాశం ఇచ్చారు. జట్టు వికెట్లు పడుతున్న సమయంలో క్రీజులోకి వచ్చి శ్రేయస్ అయ్యర్‌తో కలిపి భాగస్వామ్యం నెలకొల్పాడు. 36 పరుగులు సాధించాడు.
సంజూ శాంసన్ రాణిస్తున్నప్పటికీ అతడి స్థానంలో మరికొంతమందికి అవకాశం కల్పిస్తున్నారు. ముఖ్యంగా పంత్‌ను ప్రత్యామ్నాయంగా చూసి ఎక్కువ అవకాశాలు ఇస్తున్నారు. కానీ, అతడు విఫలమవుతుండటంతో విమర్శలు వస్తున్నాయి.
ప్రపంచకప్‌కు ముందు సంజూకి ద్వైపాక్షిక సిరీస్‌లలో అవకాశం కల్పించారు. కానీ, వాటిని పెద్దగా ఉపయోగించుకోలేదని భావిస్తారు. తర్వాత మళ్లీ పుంజుకున్నప్పటికీ కొత్తవాళ్లు కూడా అప్పటికే వారి ప్రదర్శనతో ఆకట్టుకోవటంతో కాస్త అవకాశాలు తగ్గాయి.
ప్రస్తుతం టీమిండియాలో కుర్రాళ్లు అదరగొడుతున్నారు. వారితో సంజూ పోటీపడాల్సి ఉంది. మళ్లీ తనదైన ప్రదర్శన ఇచ్చి కీలక ఇన్నింగ్స్ లు ఆడితే జట్టులో స్థానం సుస్థిరంగా ఉంటుంది.