దర్శకధీరుడు రాజమౌళి తెరకెక్కించిన ‘ఆర్‌ఆర్‌ఆర్‌’ అంతర్జాతీయ స్థాయిలో గుర్తింపు పొందింది. ఈ చిత్రం ద్వారా తారక్‌, రామ్‌చరణ్‌ పాన్‌ ఇండియా స్టార్లుగా మారిపోయారు. ఈ మూవీలోని ‘నాటు నాటు’ పాట ఏకంగా ఆస్కార్ అవార్డును కొల్లగొట్టింది.

అల్లు అర్జున్‌ హీరోగా సుకుమార్‌ డైరెక్షన్‌లో వచ్చిన ‘పుష్ప’ సినిమా కూడా జాతీయ స్థాయిలో బాగా పాపులర్‌ అయ్యింది. ఇందులో బన్నీ నటనకు బాలీవుడ్‌ అభిమానులు సైతం ఫిదా అయ్యారు. ఈ సినిమా రిలీజ్‌ తర్వాత బన్నీ క్రేజ్‌ ఒక్కసారిగా పెరిగిపోయింది. త్వరలోనే ఈ సినిమాకు సీక్వెల్‌ కూడా రాబోతోంది. ప్రస్తుతం ‘పుష్ప2’ షూటింగ్ శరవేగంగా సాగుతోంది.

ఈ ఏడాది టాలీవుడ్‌ నుంచి రిలీజైన పాన్‌ ఇండియా చిత్రం దసరా. ఇందులో నాని తన నటనతో పూనకాలు తెప్పించాడు. దర్శకుడు శ్రీకాంత్‌ ఒదెల తన తొలి సినిమాతోనే రూ.100 కోట్ల క్లబ్‌లో చేరిపోయాడు. ఇందులో కీర్తి సురేష్‌ నటనకు మంచి మార్కులు పడ్డాయి.

టాలీవుడ్‌కు చెందిన పలు చిత్రాలు రిలీజ్‌కు ముందే దేశవ్యాప్తంగా సెన్సేషన్‌ క్రియేట్ చేస్తున్నాయి. ప్రభాస్‌ హీరోగా కేజీఎఫ్‌ డైరెక్టర్‌ ప్రశాంత్‌ నీల్‌ తెరకెక్కిస్తున్న ‘సలార్‌’ చిత్రం జాతీయ స్థాయిలో క్రేజ్‌ సొంతం చేసుకుంది. ఈ మూవీకి సంబంధించి ఏ చిన్న అప్‌డేట్‌ వచ్చిన దేశమంతా ఆసక్తిగా తెలుసుకుంటోంది.

ప్రభాస్‌ నటిస్తున్న మరో పాన్ ఇండియా చిత్రం ప్రాజెక్ట్‌ K. ఈ సినిమా టైటిల్‌ను ఇటీవలే ‘కల్కి 2898 ఏడీ’గా మార్చారు. ఈ మూవీపై కూడా జాతీయ స్థాయిలో అంచనాలు ఉన్నాయి. కొద్ది రోజుల క్రితం వచ్చిన ఈ మూవీ గ్లింప్స్‌ సగటు సినీ అభిమానిని షేక్‌ చేసింది.

ఆర్‌ఆర్‌ఆర్‌ తర్వాత తారక్‌ నటిస్తున్న మరో పాన్‌ ఇండియా చిత్రం దేవర. ఇందులో బాలీవుడ్‌ బ్యూటీ జాన్వీ కపూర్‌ హీరోయిన్‌గా నటిస్తోంది. కొరటాల శివ దర్శకత్వం వహిస్తున్నాడు. వచ్చే ఏడాది ఏప్రిల్‌లో మూవీని రిలీజ్ చేయాలని మేకర్స్‌ ప్లాన్‌ చేస్తున్నారు.