నాగార్జున కెరీర్‌లో గుర్తుండిపోయే చిత్రాల్లో ఊపిరి ఒకటి. సినిమా మెుత్తం నాగార్జున వీల్‌చైర్‌లోనే కనిపిస్తారు. ముఖం ద్వారానే తన హావాభావాలను పలికించి ప్రేక్షకులను ఆకట్టుకున్నారు. తమిళ నటుడు కార్తీ ఇందులో కీలక పాత్ర పోషించారు. ఈ చిత్రానికి వంశీ పైడిపల్లి దర్శకత్వం వహించారు. కార్తీకి జంటగా తమన్నా నటించింది. ప్రకాష్‌ రాజ్‌, జయసుధ, తనికెళ్లభరణి ప్రధాన పాత్రలు పోషించారు.

అక్కినేని నాగార్జునలోని నిజమైన నటుడ్ని వెలికితీసిన చిత్రం 'అన్నమయ్య'. అప్పటివరకూ వరుసగా కమర్షియల్‌ చిత్రాలు చేసుకుంటూ వెళ్లిన నాగార్జున అన్నమ్మయ్యతో అందరినీ ఆశ్చర్య పరిచాడు. రాఘవేంద్రరావు దర్శకత్వం వహించిన ఈ మూవీలో సుమన్‌ వెంకటేశ్వర స్వామిగా కనిపించారు. రమ్యకృష్ణ, కస్తూరి, భానుప్రియ, మోహన్ బాబు, రోజా, బ్రహ్మానందం ప్రధాన పాత్రలు పోషించారు. ఎం.ఎం. కీరవాణి సంగీతాన్ని అందించాడు.

టాలీవుడ్‌లో కొత్త ట్రెండ్‌ను క్రియేట్ చేసిన చిత్రం ‘శివ’. మూస ధోరణి సినిమాలతో వెళ్తున్న తెలుగు ఇండస్ట్రీకి దర్శకుడు రామ్‌గోపాల్‌ వర్మ కొత్తదనాన్ని పరిచయం చేశాడు. ఈ సినిమాలో హీరో నాగార్జున సైకిల్ చైన్ తెంపి విలన్స్ భరతం పట్టే సీన్ ఎవర్ గ్రీన్. అంతేకాదు తెలుగులో సౌండ్ ఎఫెక్ట్ పై ఎక్కువగా ఫోకస్ పెట్టిన మెుదటి చిత్రంగానూ శివ నిలిచింది. ఈ సినిమా విజయంతో హీరో నాగార్జున టాప్‌ హీరోల జాబితాలో చేరిపోయాడు. కాగా ఇందులో హీరోయిన్‌గా అమల చేయగా, ఇళయరాజా సంగీతం అందించారు.