దర్శకధీరుడు రాజమౌళి తీసిన అత్యుత్తమ చిత్రాల్లో ‘సై’ ఒకటి. ఇందులో హీరోగా నితిన్‌ నటించాడు. 2004లో విడుదలైన ఈ చిత్రం అప్పట్లో సెన్సేషన్‌ క్రియేట్ చేసింది. ఈ సినిమా ప్రధానంగా రగ్బీ ఆట చుట్టూ తిరుగుతుంది. తమ కాలేజీ మైదానాన్ని విలన్‌ నుంచి కాపాడుకునేందుకు స్టూడెంట్స్‌ ఏం చేశారనేది ఈ మూవీ కథాంశం. ఇందులో హీరోయిన్‌గా జెనీలియా చేసింది. శశాంక్, రాజీవ్‌ కనకాల, ప్రదీప్‌ రావత్‌ కీలక పాత్రలు పోషించారు. ఎం.ఎం. కీరవాణి సంగీతం అందించారు.

హీరో నితిన్‌ అంధుడిగా నటించిన సినిమా ‘మ్యాస్ట్రో’. బాలీవుడ్‌లో ఘన విజయం సాధించిన ‘అంధాదున్‌’ చిత్రానికి రీమేక్‌గా ఇది తెరకెక్కింది. అంధుడైన అరుణ్‌ (నితిన్‌) ఓ హత్యను కళ్లారా చూస్తాడు. అనంతరం విపత్కర పరిస్థితులను ఎదుర్కొంటాడు. అసలు అరుణ్‌కు కళ్లు ఎలా పోయాయి? హత్య అనంతర ఘటనల నుంచి ఎలా బయటపడ్డాడు? అనేది అసలు కథ. ఇందులో నితిన్‌కు జోడీగా నభా నటేశ్‌ నటించింది. తమన్నా, నరేష్‌, శ్రీముఖి, జిషు సేన్‌ గుప్తా ప్రధాన పాత్రలు పోషించారు.

నితిన్‌, దర్శకుడు తేజ కాంబినేషన్‌లో వచ్చిన సూపర్‌ హిట్‌ చిత్రం 'జయం'. ఇందులో అమాయకుడైన యువకుడి పాత్రలో నితిన్‌ అద్భుతంగా నటించాడు. హీరోయిన్‌ ఇచ్చిన ధైర్యంతో విరోచితంగా విలన్‌తో పోరాడి మెప్పించాడు. ఇందులో సదా హీరోయిన్‌గా చేసింది. విలన్‌ పాత్రను గోపిచంద్ పోషించాడు. ఆర్‌.పి. పట్నాయక్‌ అందించిన సంగీతం అప్పట్లో యూత్‌ను ఎంతగానో ఆకట్టుకుంది.