తెలుగు సినిమాకు ఎనలేని గౌరవం తెచ్చిన డైరెక్టర్లలో కె. విశ్వనాథ్ అగ్రగణ్యులు. భారతీయ లలిత కళల నేపథ్యంలో ఆయన సృష్టించిన సినిమాలు అంతర్జాతీయంగాను గుర్తింపు పొందాయి. ఆత్మగౌరం(1966) చిత్రం ద్వారా డెరెక్టర్‌గా పరిచయం అయ్యారు. తొలి చిత్రంతోనే ఆయన నంది అవార్డు అందుకున్నారు. ఆయన శంకరాభరణం, సాగరసంగమం, శృతిలయలు, సిరివెన్నెల, స్వర్ణకమలం, స్వాతికిరణం, సప్తపది, స్వాతిముత్యం, స్వయంకృషి, ఆపద్బాంధవుడు వంటి ఆణిముత్యాలను తెలుగు ప్రేక్షకులకు అందించారు. ఆయన కేవలం దర్శకుడిగా మాత్రమే కాకుండా... నటుడిగా గాను గుర్తింపు పొందారు. నరసింహనాయుడు, ఆడవారి మాటలకు అర్థాలే వేరులే, ఠాగూర్, అతడు, ఆంధ్రుడు, మిస్టర్ పర్‌ఫెక్ట్, కలిసుందాం రా వంటి హిట్ చిత్రాల్లో ముఖ్య పాత్రల్లో మెప్పించారు. 1992లో రఘుపతి వెంకయ్య అవార్డు, పద్మశ్రీ పురస్కారం, 2016లో దాదాసాహెబ్ ఫాల్కే పురస్కారం అందుకున్నారు. కె. విశ్వనాథ్ మొత్తం 60 సినిమాలకు దర్శకత్వం వహించారు. శంకరాభరణానికి జాతీయ పురస్కారంతో పాటు సప్తపదికి జాతీయ సమగ్రతా పురస్కారం లభించింది. స్వాతిముత్యం సినిమా 1986లో ఆస్కార్ అవార్డుకు అధికారిక ప్రవేశం పొందింది.