కావ్య కళ్యాణ్‌రామ్ టాలీవుడ్ యంగ్ హీరోయిన్. తెలంగాణలోని కొత్తగూడెంలో కళ్యాణ్‌రామ్, భవానీ పెద్దిబొట్ల దంపతులకు జన్మించింది. న్యాయశాస్త్రంలో గ్రాడ్యూయేషన్ పూర్తి చేసింది. 2003లో వచ్చిన గంగోత్రిలో బాలనటిగా తెలుగు తెరకు అరంగేట్రం చేసిన కావ్య కళ్యాణ్ రామ్ బాలనటిగా మంచిపేరు తెచ్చుకుంది. ‘వ‌ల్లంకి పిట్టా వల్లంకి పిట్టా మెల్లంగ ర‌మ్మంటా’ అని సాగే పాటలో ఆమె నటనతో తెలుగు ప్రేక్షకులను ఆకట్టుకుంది. కావ్య కళ్యాణ్ రామ్ చైల్డ్ ఆర్టిస్ట్‌గా స్నేహమంటే ఇదేరా, ఠాగూర్, అడవి రాముడు, విజయేంద్ర వర్మ, బాలు, బన్నీ, సుభాష్ చంద్రబోస్, పాండురంగడు వంటి పలు సినిమాల్లో నటించింది. అయితే 2022లో సాయి కిరణ్ దర్శకత్వం వహించిన హర్రర్ చిత్రం మసూదలో ఆమె ప్రధాన పాత్రతో తెలుగు సినిమాలోకి పునరాగమనం చేసింది. ఆ తర్వాత బలగం సినిమా ద్వారా మంచి గుర్తింపు సాధించింది.