ఎస్‌.పి. బాలసుబ్రహ్మణ్యం భారతీయ సుప్రసిద్ధ నేపథ్య గాయకుడు. ఆయన ప్రధానంగా తెలుగు, తమిళ్, కన్నడ, మలయాళి, హిందీ భాషల్లో పాడారు. అన్ని భాషల్లో కలిపి దాదాపు 40 వేలకు పైగా పాటలు పాడారు. శ్రీశ్రీశ్రీ మర్యాద రామన్న(1966) చిత్రంతో నేపథ్య గాయకుడిగా తన ప్రస్థానం ప్రారంభించారు. కేవలం గాయకుడిగా మాత్రమే కాకుండా నటుడిగాను అలరించారు. ప్రేమ, ప్రేమికుడు, పవిత్రబంధం, ఆరోప్రాణం, రక్షకుడు, దీర్ఘసుమంగళీ, భవ, మిథునం వంటి చిత్రాల్లో నటించి మెప్పించారు. డబ్బింగ్‌ ఆర్టిస్ట్‌గాను ఎంతో మంది హీరోలకు గాత్ర దానం చేశారు. ముఖ్యంగా.. రజినీకాంత్, కమల్‌హాసన్, సల్మాన్ ఖాన్, విష్ణువర్ధన్, జెమిని గణేశన్, అర్జున్, రఘువరన్ లాంటి నటులకు తెలుగులో డబ్బింగ్ చెప్పారు. బుల్లితెర వ్యాఖ్యాతగాను వ్యవహరించారు. ఈటీవీలో ప్రసారమయ్యే పాడుతా తీయగా కార్యక్రమానికి వ్యాఖ్యాతగా 1996-2020 వరకు వ్యవహరించారు.