విజయలలిత తెలుగు సినిమా నటి. టాలీవుడ్ లేడీ సూపర్ స్టార్ విజయశాంతి చిన్నమ్మ. శృంగార నాట్యతారగా సినీ జీవితాన్ని ప్రారంభించి, హీరోయిన్‌గాను ఆ తర్వాత నిర్మాతగానూ చిత్రపరిశ్రమకు సేవలందించింది. తెలుగులో ఎన్.టి.రామారావు, అక్కినేని నాగేశ్వరరావు తదితర అగ్ర హీరోల సరసన నటించిన ఈమె లేడీ జేమ్స్‌బాండ్ పాత్రలకు ప్రసిద్ధి. ఈమె నటించిన సినిమాలలో రౌడీరాణి, రివాల్వర్ రాణి, చలాకీ రాణి కిలాడీ రాజా, భలే రంగడు, మనుషుల్లో దేవుడు, కదలడు వదలడు సినిమాలు ప్రసిద్ధమైనవి. దాదాపు 800కు పైగా చిత్రాల్లో నటించి గుర్తింపు పొందింది. ఫిల్మ్ ఇండస్ట్రీలో క్రమశిక్షణకు మారుపేరుగా విజయ లలిత నిలిచింది. సమయపాలనతో కచ్చితమైన సమయానికి సినిమా షూటింగులకు హాజరవుతూ ఉండేది. విజయలలిత ఉదయం 7 గంటలకు కాల్‌ షీట్‌ అంటే 6 గంటలకే మేకప్‌ చేయించుకుని కార్లో వచ్చి 7 గంటలకి షూటింగ్‌ వున్న స్టూడియోకి వచ్చి ఫ్లోర్‌గేట్‌ తాళం తీయక పోయినా, అక్కడే కూర్చునేది. ఈ క్రమశిక్షణా ధోరణి వలన ఈమెకు అనేక సినిమాలలో నటించే అవకాశాలు వచ్చాయి.