హస్య బ్రహ్మగా టాలీవుడ్‌లో గుర్తింపు పొందిన బ్రహ్మానందం(1987) ఆహా నా పెళ్లంట చిత్రం ద్వారా హస్య నటుడిగా తెలుగు తెరకు పరిచయం అయ్యారు. తొలి చిత్రంతోనే ఆయనకు విశేష గుర్తింపు దక్కింది. ఈ చిత్రంలో ఆయన పంచిన హస్యానికి అవకాశాలు వెల్లువెత్తాయి. మూడు దశాబ్దాలకు పైగా కొనసాగుతున్న ఆయన సినీ కెరీర్‌లో దాదాపు వెయ్యికి పైగా చిత్రాల్లో ఆయన నటించారు. ఈ ఘనత సాధించిన ఏకైక కామెడీ నటుడిగా గుర్తింపు పొందారు. బాబాయి హోటల్, మనీ మనీ, చిట్టమ్మ మొగుడు, ముగ్గురు మొనగాళ్లు, అల్లుడా మజాక, సాహసవీరుడు సాగర కన్య, పెళ్లి సందడి, ఆంధ్రవాలా, క్షేమంగా వెళ్లి లాభంగా రండి, పెదరాయుడు, ఢీ, వెంకీ, దుబాయ్ శీను, విక్రమార్కుడు, బద్రి, లౌఖ్యం, పోకిరీ, ఎవడి గోల వాడిది, యమదొంగ, రెడీ, దూకుడు, అదుర్స్, రంగమార్తండ వంటి చిత్రాల్లో ఆయన చేసిన పాత్రలు ప్రేక్షకుల హృదయాల్లో నిలిచిపోయేలా చేశాయి. వ్యక్తిగత జీవితం: బ్రహ్మానందం భార్య పేరు లక్ష్మి. ఈ దంపతులకు ఇద్దరు కుమారులు గౌతం, సిద్ధార్థ్. గౌతమ్ హీరోగా 'పల్లకిలో పెళ్ళికూతురు' అనే చిత్రంలో హీరోగా నటించాడు. బ్రహ్మానందం చిత్రలేఖనంలో ప్రవీణ్యం ఉంది. ఖాళీ సమయాల్లో బొమ్మలు గీస్తుంటాడు. అవార్డులు: బ్రహ్మానందం తన అద్భుత హాస్య నటనకు గాను ఎన్నో అవార్డులు, పురస్కారాలు పొందారు. ఉత్తమ హాస్యనటుడిగా 5 నంది అవార్డులు, ఒక ఫిల్మ్‌ఫేర్ పురస్కారం, 3 సైమా అవార్డులు అందుకున్నారు. ప్రపంచంలో అత్యధిక సినిమాల్లో నటించిన నటుడిగా ఆయన గిన్నిస్ బుక్‌ ఆఫ్ వరల్డ్ రికార్డు సాధించాడు.