దుల్కర్ సల్మాన్ మలయాళి లెజండరీ నటుడు మమ్ముటి చిన్న కుమారుడు. 1983 జులై 28న కొచ్చిలో జన్మించాడు. అతని ప్రాథమిక విద్యను కొచ్చి, చెన్నైలో పూర్తి చేశాడు. దుబాయ్‌లో MBA పూర్తి చేశాడు. అక్కడే ఓ ఐటీ సంస్థలో పనిచేశాడు. కార్పోరేట్ జీవితంపై విసుగు చెందిన దుల్కర్ నటనవైపు మొగ్గు చూపాడు. నట ప్రస్థానం: సెకండ్ షో (2012) మలయాళ చిత్రంతో దుల్కర్ తెరంగేట్రం చేశాడు. ఆయన రెండవ సినిమా ఉస్తాద్ హోటల్ (2012) బ్లాక్ బాస్టర్ హిట్‌గా నిలిచింది. జాతీయ చలనచిత్ర పురస్కారాల్లో ఉత్తమ ప్రజాదరణ పొందిన వినోద చిత్రంగా నిలిచింది. బాలాజీ మోహన్ దర్శకత్వం వహించిన వాయై మూడి పేశవుం (2014)తో దుల్కర్ తమిళ సినిమా పరిశ్రమలో ప్రవేశించారు. ఫిల్మ్ ఫేర్ అవార్డుల్లో ఉత్తమ తొలిచిత్ర నటుడిగా పురస్కారాన్ని అందుకున్నారు. 2015లో చార్లీ నటనకు కేరళ రాష్ట్ర సినిమా పురస్కారాల్లో ఉత్తమ నటుడు అవార్డు పొందారు. తెలుగులో తొలిసారి ఆయన మణిరత్నం డైరెక్ట్ చేసిన 'ఓకే బంగారం' (2015)అనే అనువాద చిత్రం ద్వారా పరిచయం అయ్యాడు. తర్వాత నాగ్‌ అశ్విన్ డైరెక్ట్ చేసిన మహానటి( 2018) చిత్రం ద్వారా తెలుగు ప్రేక్షకులకు మరింత దగ్గరయ్యాడు. ఈ చిత్రం బాక్సాఫీస్ వద్ద భారీ విజయాన్ని సాధించింది. ఆ తర్వాత హను రాఘవపూడి డైరెక్ట్ చేసిన సీతారామం(2022) చిత్రం దుల్కర్ కెరీర్‌లో బిగ్గెస్ట్ హిట్‌గా నిలిచింది. ఈ చిత్రంలో ఆయన నటనకు విమర్శకుల ప్రశంసలు దక్కాయి. ఆ తర్వాత మళ్లీ తెలుగులోనే కింగ్‌ ఆఫ్ కొత్త(2023) చిత్రంలో నటించి తెలుగులో తన మార్కెట్‌ను దుల్కర్ విస్తరించుకున్నాడు.