తెలుగులో కాంతారావు గారు జానపద, పౌరాణిక పాత్రలకు ప్రసిద్ధి చెందారు. ఆయన ముఖ్యంగా కత్తి యుద్ధాలకు ప్రఖ్యాతి గాంచారు. తెలుగులో ఆయన నిర్దోషి చిత్రం ద్వారా ఆరంగేట్రం చేశారు. రామారావు, నాగేశ్వరరావులకు సమకాలికులుగా సమాన గుర్తింపు పొందారు. ఆయన మొత్తం 400కు పైగా చిత్రాల్లో నటించారు. పౌరాణికాల్లో అభినవ నారదుడిగా కీర్తించబడ్డారు. కాంతారావు కృష్ణుడు, అర్జునుడు పాత్రలను పోషించి ప్రసిద్ది చెందారు. చిక్కడు దొరకడు, రణభేరి, గండరగండడు, మాంగళ్యం, రక్తసంబంధం, నర్తనశాల, పాండవ వనవాసం వంటి హిట్ చిత్రాల్లో నటించారు. నష్టం తెచ్చిన సొంత సినిమాలు: కాంతారావు నటుడిగా విజయవంతమైనప్పటికీ... నిర్మాతగా విఫలమయ్యారు. ఆ నష్టాలు ఆయన్ను కోలుకోని విధంగా చేశాయి. సినిమా నిర్మాణరంగంపై అడుగు పెట్టాలన్న ఆలోచనతో 1969లో హైమా ఫిలిమ్స్‌ను కాంతారావు స్థాపించారు. ఈ బ్యానర్‌లో సప్తస్వరాలు అనే చిత్రాన్ని నిర్మించారు. ఆ సమయంలో ప్రత్యేక తెలంగాణ ఉద్యమం, జై ఆంధ్ర ఉద్యమాల ప్రభావం సినిమాలపై పడింది. అలాంటి పరిస్థితుల్లో విడుదలైన ఈచిత్రం పరాజయం పొందింది. తర్వాత నిర్మించిన గండర గండడు చిత్రం విడుదలై విజయం సాధించినప్పటికీ.. సప్తస్వరాలు తెచ్చిన నష్టాన్ని పూడ్చలేకపోయింది. ఆ తర్వాత కృష్ణ హీరోగా ప్రేమజీవులు చిత్రాన్ని నిర్మించగా అది కూడా ఘోర పరాజయం పొందింది. ఇంత నష్టం వాటిల్లుతున్నా తనవద్ద సహాయకుడిగా పనిచేసిన చక్రవర్తి హిందీ సినిమా 'గుమ్ నామ్' ఆధారంగా ఒక కథ తయారుచేసి కాంతారావు చేత పన్నెండు లక్షలు ఖర్చు పెట్టించి 'గుండెలు తీసిన మొనగాడు' (1974) చిత్రాన్ని కలర్ లో నిర్మింపజేశాడు. ఆ సినిమా కాంతారావును అన్నివిధాలా నష్టపరుస్తూ 16 లక్షల అప్పును మిగిల్చింది. చివరిసారిగా 1989 లో 'స్వాతిచినుకులు' సినిమా నిర్మించి నగానట్రా కూడా అమ్ముకొని లక్షలకొద్దీ అప్పుల వూబిలో పూర్తిగా కూరుకుపోయారు. దాంతో కాంతారావు మద్రాసు నగరాన్ని విడిచిపెట్టి రావలసివచ్చింది. ఆ తర్వాత ఆయన కెరీర్‌ పూర్తిగా పతన స్థితికి చేరింది. చిన్న చిన్న పాత్రలకు పరిమితం కావాల్సి వచ్చింది. కుటుంబం: కాంతారావుకు తొలుత వేలమూరి సుశీలతో వివాహం అయింది. ఆమె అనారోగ్యంతో మరణించడంతో హైమావతిని పెళ్లి చేసుకున్నారు. ఈ దంపతులకు నలుగురు కుమారులు, ఒక కుమార్తే. కాంతారావు కుమారుడు రాజా, సుడిగుండాలు సినిమాలో నటించారు. ఆ చిత్రానికి ఉత్తమ బాల నటుడిగా నంది అవార్డు అందుకున్నారు. అవార్డులు: లవకుశలో లక్ష్మణుడిగా నటించి 1963లో విశేష పురస్కారం అందుకున్నారు. ఆంధ్రప్రదేశ్ ప్రభుత్వం ప్రతిష్టాత్మక పురస్కారం రఘుపతి వెంకయ్య అవార్డు అందుకున్నారు. ప్రముఖ దర్శకుడు దాసరి నారాయణరావు మాటల్లో "తెలుగు చలనచిత్ర సీమకు రామారావు, నాగేశ్వరరావులు రెండు కళ్ళైతే , వాటి మధ్య తిలకం వంటివారు కాంతారావు"అని ప్రశంసించారు.