కృతి శెట్టి ప్రధానంగా తెలుగు, తమిళం, హిందీ భాషల్లో హీరోయిన్‌గా నటిస్తోంది. ఆమె హిందీలో సూపర్ 30 చిత్రం ద్వారా వెండి తెరకు పరిచయం అయింది. తెలుగులో బుచ్చిబాబు డైరెక్ట్ చేసిన ఉప్పెన చిత్రం ద్వారా టాలీవుడ్‌లోకి అడుగు పెట్టింది. ఈ చిత్రం బాక్సాఫీస్ వద్ద మంచి విజయం సాధించడంతో ఆమెకు అవకాశాలు వరుస కట్టాయి. కృతి శెట్టి 2003 సెప్టెంబర్ 21న ముంబైలో మంగళూరుకు చెందిన తుళు కుటుంబంలో జన్మించింది. ఆమె తండ్రి వ్యాపారవేత్త కాగా, తల్లి ఫ్యాషన్ డిజైనర్. విద్యాభ్యాసం అంతా ముంబైలోనే జరిగింది. నట ప్రస్థానం: తెలుగులో కృతి శెట్టి తొలి చిత్రం ఉప్పెన బ్లాక్‌బాస్టర్ హిట్ కావడంతో ఆమె అందానికి అవకాశాలు దాసోహమయ్యాయి. నానితో 'శ్యామ్‌ సింగ రాయ్'(2021), రామ్‌ పొత్తినేనితో 'ది వారియర్'(2022), నితిన్‌తో 'మాచర్లనియోజకవర్గం'(2022), సుధీర్‌బాబుతో 'ఆ అమ్మాయి గురించి మీకు చెప్పాలి', నాగచైతన్యతో కస్టడీ(2023) వంటి చిత్రాల్లో నటించింది. కృతి శెట్టికి కెరీర్‌ పరంగా అదృష్టం కలిసి రావడం లేదు. ఉప్పెన, శ్యామ్ సింగరాయ్ మినహా మిగతా అన్ని చిత్రాలు బాక్సాఫీస్‌ వద్ద పరాజయం పాలయ్యాయి.