తెలుగు చిత్ర పరిశ్రమలో నందమూరి తారాకరామారావు(NTR) లెజెండరీ నటులు. తెలుగులో 'మనదేశం'(1949) చిత్రం ద్వారా ఆరంగేట్రం చేశారు. ఆయన సినీ కెరీర్‌లో దాదాపు 300లకు పైగా సినిమాల్లో నటించారు. ఎన్టీఆర్ ప్రత్యేకించి శ్రీకృష్ణుడు, శ్రీరాముడు హిందూ దేవతల పాత్రలకు ప్రసిద్ధి చెందాడు. ఈ వేషాల్లో ఆయన నటనను చూసి అభిమానులు ఆయన్ను నిజంగా దేవుడిగా ఆరాధించేవారు. 'మాయాబజార్', 'నర్తనశాల', శ్రీకృష్ణార్జున యుద్ధం, లవకుశ, భూకైలాష్, దానవీరశూరకర్ణ వంటి పౌరాణిక చిత్రాల్లో ఆయన నటనకు విమర్శకుల ప్రశంసలు దక్కాయి. మిస్సమ్మ, గుండమ్మకథ, మల్లీశ్వరి, కన్యాశుల్కం, రక్తసంబంధం, వేటగాడు, జస్టిస్ చౌదరి, బొబ్బిలిపులి వంటి క్లాసిక్ చిత్రాల్లో ఆయన నటించిన తీరు తెలుగు సినిమాపై చెరగని ముద్ర వేసింది. ఆయన నటనకు మాత్రమే పరిమితం కాకుండా అనేక చిత్రాలకు డైరెక్షన్ చేయడంతో పాటు నిర్మించారు. విశ్వ విఖ్యాత నటసార్వభౌముడుగా బిరుదాంకితుడైన NTR మహాశయుడు తన 44 ఏళ్ళ సినిమా జీవితంలో 13 చారిత్రకాలు, 55 జానపద, 186 సాంఘిక, 44 పౌరాణిక చిత్రాలు చేశారు. అవార్డులు: ఎన్టీఆర్ కెరీర్‌లో ఎన్నో అవార్డులు, పురస్కారాలు అందుకున్నారు. వరకట్నం, తోడు దొంగలు, సీతారామ కళ్యాణం చిత్రాలకు గాను జాతీయ చలన చిత్ర అవార్డులను అందుకున్నారు. 1968 భారత ప్రభుత్వం నుండి పద్మశ్రీ అవార్డ్ అందుకున్నారు. 1978లో ఆంధ్రా విశ్వవిద్యాలయం నుండి గౌరవ డాక్టరేటు 'కళాప్రపూర్ణ ' స్వీకరించారు. ఎన్టీఆర్ శతజయంతి ఉత్సవాల సందర్భంగా భారత ప్రభుత్వం ఆయన జ్ఞాపకార్థంగా రూ.100 నాణేన్ని విడుదల చేసింది. రాజకీయ ప్రస్థానం: ఆంధ్రప్రదేశ్‌లో కాంగ్రెస్ అధిష్ఠానం తరచు ముఖ్యమంత్రులను మారుస్తూ తెలుగువారిని అవమానిస్తోందన్న తలంపుతో ఆత్మగౌరవ నినాదంతో 'ఎన్టీఆర్' తెలుగు దేశం పార్టీని 1982 మార్చి 29న స్థాపించాడు. పార్టీ పెట్టిన కేవలం 9నెలల్లోనే అధికారానికి వచ్చి ముఖ్యమంత్రిగా బాధ్యతలు చేపట్టిన ఏకైక వ్యక్తిగా ఎన్టీఆర్ చరిత్ర సృష్టించారు. 1983- 1995 వరకు ఎన్టీఆర్ మూడు సార్లు ముఖ్యమంత్రిగా ప్రమాణ స్వీకారం చేశారు. రూ.1కే కిలో బియ్యం, పెన్షన్లు, బలహీనవర్గాలకు రిజర్వేషన్లు, సంపూర్ణ మద్యపాన నిషేధం, వంటి సంక్షేమ పథకాలు ఆయనకు గుర్తింపు తెచ్చాయి. వ్యక్తిగత జీవితం: తారక రామారావు, మొదిటి భార్య బసవతారకం దంపతులకు 11 మంది సంతానం. పదకొండు మందిలో ఏడుగురు కుమారులు, నలుగురు కుమార్తెలు. జయకృష్ణ, సాయికృష్ణ. హరికృష్ణ, మోహనకృష్ణ, బాలకృష్ణ, రామకృష్ణ, జయశంకర్ కృష్ణ కుమారులు కాగా; లోకేశ్వరి, దగ్గుబాటి పురంధరేశ్వరి, నారా భువనేశ్వరి, కంటమనేని ఉమామహేశ్వరి కుమార్తెలు. తన జీవితకథ రాస్తున్న లక్ష్మీపార్వతిని 1993 సెప్టెంబరులో పెళ్ళి చేసుకున్నాడు. ఎన్టీఆర్ కుటుంబం దక్షిణ భారత చలనచిత్ర పరిశ్రమలో ప్రసిద్ధి చెందింది, ఆయన సంతానం నట వారసత్వాన్ని కొనసాగిస్తున్నారు. అతని కుమారుడు, నందమూరి బాలకృష్ణ, ప్రముఖ తెలుగు నటుడు అతని మరొక కుమారుడు, నందమూరి హరికృష్ణ కూడా నటుడు మరియు రాజకీయ నాయకుడు. ఆయన మనవడు జూనియర్ ఎన్టీఆర్ (నందమూరి తారక రామారావు) కూడా తెలుగు చిత్రసీమలో ప్రముఖ నటుడు. చివరగా..: చలనచిత్ర, రాజకీయ రంగంలో ఎన్టీఆర్ పాత్ర మాటలకు, రాతలకు అందనిది. ఆయన నిష్ణాతుడైన దర్శకుడు, నిర్మాత, స్క్రీన్ రైటర్‌గా బహముఖ ప్రజ్ఞ చూపారు. సినీ పరిశ్రమలో ఆయన చొరవ తెలుగు సినిమా కథన శైలి, కంటెంట్‌ను గణనీయంగా మార్చివేసింది. తెలుగుదేశం పార్టీని స్థాపించి ముఖ్యమంత్రిగా అధికారం చేపట్టి... రాజకీయాల్లో గణనీయమైన ప్రభావం చూపారు. పేదల దైవంగా మారారు. 44 ఏళ్ల సినీ జీవితంలోను, పదమూడేళ్ళ రాజకీయ జీవితంలోను నాయకుడిగా వెలిగిన ఎన్టీఆర్ చిరస్మరణీయుడు.