యంగ్ టైగర్ ఎన్టీఆర్ మే 20, 1983న హరికృష్ణ, షాలిని దంపతులకు జన్మించాడు. చిన్నతనములోనే కూచిపూడి నాట్యం నేర్చుకుని చాలా ప్రదర్శనలు ఇచ్చాడు. హైదరాబాద్‌లోని విద్యారణ్య ఉన్నత పాఠశాలలో పాఠశాల విద్యను అభ్యసించాడు. కుటుంబం: జూ.ఎన్టీఆర్ వివాహం 2011 మే 5న లక్ష్మి ప్రణతితో జరిగింది. వీరికి ఇద్దరు మగ సంతానం. అభయ్ రామ్, భార్గవ్ రామ్. తారక్ సోదరుడు కళ్యాణ్ రామ్ సైతం తెలుగులో స్టార్ హీరోల్లో ఒకడిగా వెలుగొందుతున్నాడు. తొలి చిత్రం: జూ. ఎన్టీఆర్ తాతాగారైన దిగ్గజ నటులు ఎన్టీఆర్‌ గారు తొలిసారి బ్రహ్మర్షి విశ్వామిత్ర సినిమాలో తారక్‌ను వెండితెరకు పరిచయం చేశారు. తరువాత గుణశేఖర్ డైరెక్షన్‌లో వచ్చిన బాల రామాయణము చిత్రంలో రాముడిగా నటించాడు. 2001లో హీరోగా నిన్ను చూడాలని చిత్రం ద్వారా తొలిసారి హీరోగా నటించాడు. ఈ చిత్రం పెద్దగా ఆడకపోయినా.. తారక్ ప్రేక్షకులను తనవైపు ఆకర్షించగలిగాడు. ఆ తర్వాత ఎస్. ఎస్. రాజమౌళి డైరెక్షన్‌లో వచ్చిన స్టూడెంట్ నెం.1 చిత్రంతో తొలి విజయం రుచి చూశాడు. ఆ తర్వాత వి.వి.వినాయక్ డైరెక్షన్‌లో వచ్చిన ఆది చిత్రం బ్లాక్ బాస్టర్ హిట్‌గా నిలిచింది. ఈ చిత్రంలో తారక్‌ నటన చూసి ఎంతో మంది అభిమానులుగా మారారు. ఆ తరువాతి సింహాద్రి చిత్రం మాత్రం తెలుగు సినీ చరిత్రలోనే అత్యంత భారీ విజయాల్లో ఒకటిగా నిలిచిపోయింది. ఈ సినిమా విజయంతో జూ. ఎన్టీఆర్ అగ్ర హీరోల సరసన ఒకడిగా ఎదిగాడు. సింహాద్రి తర్వాత వచ్చిన సినిమాలు వరుసగా ప్లాప్ అయ్యాయి. ఆంధ్రవాలా, సాంబ, నాఅల్లుడు, నరసింహుడు, అశోక్ చిత్రాలు డిజాస్టర్‌గా నిలిచాయి. ఆ తర్వాత యమదొంగ చిత్రం విజయంతో మళ్లీ సక్సెస్ ట్రాక్ ఎక్కాడు. అదుర్స్, బృందావనం, ఊసరవెళ్లి, బాద్‌షా, టెంపర్, నాన్నకు ప్రేమతో, జనతా గ్యారేజ్, జైలవకుశ వంటి సూపర్ హిట్లను అందుకున్నాడు. తాజాగా రాజమౌళి డైరెక్షన్‌లో వచ్చిన RRR చిత్రం అన్ని భాషల్లో ఇండస్ట్రీ హిట్‌గా నిలిచింది. అవార్డులు: తారక్ తన అద్భుతమైన నటనకు పలు అవార్డులు వరించాయి. ఉత్తమ నటుడిగా జనతా గ్యారేజ్, RRR చిత్రాలకు గాను రెండు సైమా అవార్డ్స్, రెండు నంది అవార్డులు, ఒక ఫిల్మ్‌ ఫేర్ అవార్డు లభించింది. దిగ్గజ డైరెక్టర్ రాజమౌళి ఓ ఇంటర్వ్యూలో మాట్లాడుతూ.. తన అభిమాన నటుడు జూ. ఎన్టీఆర్ అని చెప్పారు. తన డ్రీమ్ ప్రాజెక్ట్ మహాభారతంలో కృష్ణుడి క్యారెక్టర్‌కు తారక్‌ తప్ప తనకు మరో ప్రత్యామ్నాయం లేదని స్పష్టం చేశారు.