నందమూరి నటసింహంగా తెలుగు ప్రేక్షకుల హృదయాల్లో స్థానం సంపాదించుకున్న బాలకృష్ణను అభిమానులు ముద్దుగా ఆయన్ను బాలయ్య అని పిలుస్తారు. బాలకృష్ణ నందమూరి తారక రామారావు, బసవతారకం దంపతులకు తమిళనాడులోని చెన్నైలో 1960 జూన్ 10న జన్మించారు. NTR 12 మంది సంతానంలో బాలయ్య ఆరవ కుమారుడు. బాలకృష్ణ బాల్యం చెన్నైలోనే గడిచింది. హైదరాబాద్‌లోని నిజాం కాలేజీలో ఆయన కామర్స్‌లో డిగ్రీ పూర్తి చేశారు. కుటుంబం: నందమూరి బాలకృష్ణకు వసుంధర దేవితో 1982లో వివాహం జరిగింది. వీరికి ముగ్గురు సంతానం. తేజస్విని, బ్రాహ్మణి కుమార్తేలు కాగా, మోక్షజ్ఞ కుమారుడు. బాలకృష్ణ నటవారసుడిగా మోక్షజ్ఞ త్వరలోనే రానునట్లు ప్రచారం జరుగుతోంది. ఇక బాలకృష్ణ సోదరుడు దివంగత హరిక్రిష్ణ ప్రముఖ నటుడు నిర్మాత కాగా, ఆయన కుమారుడు జూ.ఎన్టీఆర్ టాలీవుడ్‌లో అగ్రహీరోగా కొనసాగుతున్నారు. నట ప్రస్థానం: బాలకృష్ణ తన 14వ ఏట తన తండ్రి NTR డైరెక్ట్ చేసిన తాతమ్మకల (1974) చిత్రంతో వెండితెరకు పరిచయం అయ్యారు. ఆయన కెరీర్‌ ఆరంభంలో చాలావరకు సహాయనటుడి పాత్రల్లోనే కనిపించారు. దానవీర శూరకర్ణ,అనార్కలి, శ్రీమద్విరాట పర్వము, శ్రీ తిరుపతి వెంకటేశ్వర కళ్యాణం సినిమాల్లో నటుడిగా మెప్పించారు. తొలిసారి హీరోగా: 1984లో వాసు డైరెక్షన్‌లో వచ్చిన 'సాహసమే జీవితం' చిత్రం ద్వారా ఆయన హీరోగా పరిచయమయ్యారు. బాలయ్య కేరీర్‌ ఆరంభంలో వచ్చిన 'జనని జన్మభూమి', మంగమ్మగారి మనవడు, అపూర్వ సోదరులు, మువ్వ గోపాలుడు వంటి చిత్రాలు మంచి విజయం సాధించాయి. కెరీర్ ఆరంభంలోనే బాలయ్య మాదిరి సూపర్ హిట్లు కొట్టిన మరో హీరో లేడనే చెప్పాలి. అగ్రహీరోగా..: తండ్రి నటవారసత్వాన్ని పుణికిపుచ్చుకున్న బాలయ్య తనదైన నటనతో విలక్షణ పాత్రలతో దూసుకెళ్లారు. ఆదిత్య 369, బొబ్బిలిసింహం, రౌడీ ఇన్‌స్పెక్టర్, పెద్దన్నయ్య, భైరవద్వీపం, సమరసింహారెడ్డి, నరసింహనాయుడు, లక్ష్మీనరసింహా, సింహా, లెజెండ్, అఖండ, వీరసింహారెడ్డి వంటి హిట్‌ చిత్రాల్లో ప్రేక్షకుల చిరస్థాయిగా నిలిచిపోయారు. బి.గోపాల్ డైరెక్ట్ చేసిన నరసింహనాయుడు సినిమా అప్పటివరకు ఉన్న టాలీవుడ్ రికార్డులన్నింటిని బద్దలు కొట్టింది. అన్ని రికార్డులు బాలయ్య పేరు మీద లిఖించబడ్డాయి. అవార్డులు: బాలకృష్ణ నట కౌశలానికి ఎన్నో అవార్డులు ఆయన్ను వరించారు. నరసింహనాయుడు, సింహా, లెజెండ్ చిత్రాలకు గాను బాలయ్య నంది అవార్డులు అందుకున్నారు. నరసింహనాయుడు, సింహా, శ్రీరామరాజ్యం, గౌతమిపుత్ర శాతకర్ణి, మువ్వగోపాలుడు, ఆదిత్య 369 చిత్రాలకు గాను ఉత్తమ నటుడిగా ఫిల్మ్‌ఫేర్ అవార్డులు అందుకున్నారు. రాజకీయల్లోకి ఎంట్రీ: ఓ వైపు సినిమాల్లోనూ నటిస్తూనే.. రాజకీయాల్లోకి బాలయ్య ప్రవేశించారు. 2014 నుంచి ఎమ్మెల్యేగా కొనసాగుతున్నారు. హిందూపురం నుంచి వరుసగా రెండో సారి ఆయన టీడీపీ నుంచి గెలుపొందారు. సేవా కార్యక్రమాలు: బాలయ్య తన తల్లి జ్ఞాపకార్థం క్యాన్సర్ రోగుల కోసం ప్రత్యేక ఆస్పత్రిని నిర్మించారు. అక్కడ రోగులకు ఉచిత వైద్యాన్ని అందిస్తూ గొప్ప మనసు చాటుకుంటున్నారు.