అల్లు రామలింగయ్య తెలుగులో గొప్ప హాస్య నటులు, ఆయన హాస్యం మూడు తరాల సినీ ప్రేక్షకులను అలరించింది. అతను కుటుంబ సభ్యులు చాలామంది సినీ పరిశ్రమలో రాణిస్తున్నారు. అతని కుమారుడు అల్లు అరవింద్ సినీ నిర్మాత. మెగాస్టార్ చిరంజీవి అతని అల్లుడు. అల్లు అర్జున్, అల్లు శిరీష్ అతని మనవళ్లు. అల్లు రామలింగయ్య పుట్టిల్లు(1952) చిత్రం ద్వారా వెండితెరకు పరిచయం అయ్యారు. ఆ తర్వాత మూగమనసులు, దొంగరాముడు, మాయా బజార్, ముత్యాల ముగ్గు, మనవూరి పాండవులు, అందాలరాముడు, శంకరాభరణం, యముడికి మొగుడు, జగదేక వీరుడు అతిలోక సుందరి, మిస్సమ్మ వంటి చిత్రాల ద్వారా గుర్తింపు పొందారు. దాదాపు 50 ఏళ్ల సినీ ప్రయాణంలో 1030 సినిమాల్లో కామెడీ విలన్, క్యారెక్టర్ పాత్రలు చేసి తెలుగు ప్రేక్షకుల హృదయాల్లో స్థానం సంపాదించారు. 1116 చిత్రాల్లో నటించాలనే కోరిక ఆయనకు ఉండేది కానీ ఆ కోరిక తీరలేదు. కేవలం నటుడిగా మాత్రమే కాకుండా అల్లు రామలింగయ్య నిర్మాతగా మారి గీతా ఆర్ట్స్ బానర్‌ను నెలకొల్పారు. బంట్రోతు భార్య, దేవుడే దిగివస్తే, బంగారు పతకం చిత్రాలను నిర్మించారు. ప్రస్తుతం గీతా ఆర్ట్స్‌ దేశంలో ప్రముఖ చిత్ర నిర్మాణ సంస్థగా వెలుగొందుతోంది. రేలంగి, రమణారెడ్డి, కుటుంబరావు కాలంతో మొదలు ఈతరం హాస్యనటులు వరకూ కొనసాగిన ఏకైక హాస్యనటుడు అల్లునే. ఆమ్యామ్య.. అప్పుం అప్పుం లాంటి ఊతపదాలు అతను సృష్టించినవే. అవార్డులు: తెలుగు ప్రేక్షకులను ఏళ్లపాటు తన హస్యంతో నవ్వించిన అల్లు అనేక అవార్డులు గెలుచుకున్నారు. భారత ప్రభుత్వం 1990లో ఆయన్ను ' పద్మశ్రీ' అవార్డుతో గౌరవించింది. రేలంగి తరువాత ' పద్మశ్రీ' అందుకున్న హాస్యనటుడు అల్లునే. 2001వ సంవత్సరానికి ఆంధ్రప్రదేశ్ ప్రభుత్వం అత్యున్నత 'రఘుపతి వెంకయ్య' అవార్డుతో సత్కరించింది. 2013లో భారత చలనచిత్ర పరిశ్రమ వందేళ్ళు పూర్తి చేసుకున్న సందర్భంలో విడుదలయిన 50 తపాలా బిళ్ళలలో ఒకటి అల్లు రామలింగయ్య జ్ఞాపకార్థం విడుదలయింది.