పవన్ కళ్యాణ్ 1971 సెప్టెంబరు 2 న కొణిదెల వెంకటరావు, అంజనాదేవి దంపతులకు మూడవ కుమారునిగా ఏపీలోని బాపట్లలో జన్మించాడు. ఆయనకు ఇద్దరు అక్కలు, ఇద్దరు అన్నయ్యలు. మెగాస్టార్ చిరంజీవి పవన్‌కు పెద్దన్నయ్య. నటుడు, నిర్మాత కొణిదెల నాగేంద్ర బాబు పవన్‌కు రెండవ అన్నయ్య. ఇండస్ట్రీలో చిరంజీవిని చూసి నటన పట్ల పవన్ ఆసక్తిని పెంచుకున్నాడు. పవన్‌కు మార్షల్ ఆర్ట్స్‌లో ప్రవీణ్యం ఉంది. కరాటేలో బ్లాక్ బెల్ట్ సంపాదించాడు. తెలుగులో చిరంజీవి తర్వాత ఆమేరకు కల్ట్ ఫ్యాన్ బేస్‌ను సంపాదించిన ఏకైక హీరోగా పవన్‌కు పేరుంది. ఓవైపు సినిమాలు చేస్తూనే మరోవైపు జనసేన పార్టీని స్థాపించి ప్రత్యక్ష రాజకీయాల్లో పవన్ పాలుపంచుకుంటున్నారు. నట ప్రస్థానం: పవన్ కళ్యాణ్ 1996లో అక్కడ అమ్మాయి ఇక్కడ అబ్బాయి సినిమా ద్వారా తెలుగు తెరకు పరిచయం అయ్యాడు. తొలి సినిమాతోనే నటన పరంగా విమర్శకుల ప్రశంసలు అందుకున్నాడు. తనకంటూ ప్రత్యేక స్టైల్, మ్యానరిజంతో కల్ట్ ఫ్యాన్ బేస్‌ను సంపాదించుకున్నాడు. కరుణాకరన్ దర్శకత్వం వహించిన తొలి ప్రేమ (1998) చిత్రం బ్లాక్ బాస్టర్ హిట్‌గా నిలిచి పవన్‌కు స్టార్‌ డం అందించింది. ఇది ఆ సంవత్సరం జాతీయ అవార్డుతో పాటు ఆరు నంది అవార్డులను గెలుచుకుంది. తమ్ముడు(1999), బద్రి(2000), ఖుషి(2001), గబ్బర్ సింగ్(2012), అత్తారింటికి దారేది(2013), వకీల్‌సాబ్(2021), భీమ్లానాయక్(2022) వంటి బ్లాక్‌బాస్టర్ హిట్లతో ప్రేక్షకుల హృదయాల్లో పవర్ స్టార్‌గా నిలిచిపోయాడు. ఖుషి సినిమా తర్వాత దాదాపు 10 ఏళ్లపాటు పవన్‌కు సరైన హిట్‌ పడనప్పటికీ.. తన స్టార్ డం మాత్రం చెక్కు చెదరకుండా నిలబెట్టుకున్న ఏకైక హీరో పవన్‌ కళ్యాణ్. రాజకీయ ప్రస్థానం: ఉన్నత భావాలతో పవన్ కళ్యాణ్ 2014 మార్చి 14న జనసేన పార్టీ పేరుతో రాజకీయ పార్టీని స్థాపించాడు. జనసేన పార్టీ సిద్ధాంతాలను వివరిస్తూ ఇజం అనే పుస్తకాన్ని రాశాడు. 2014 ఏపీ అసెంబ్లీ ఎన్నికల్లో బీజేపీ, టీడీపీ కూటమికి మద్దతు తెలిపాడు. ఆంధ్రప్రదేశ్‌, తెలంగాణ రాష్ట్రాల్లో తెలుగుదేశం పార్టీ (టీడీపీ), బీజేపీ కూటమి కోసం విస్తృతంగా ప్రచారం చేశాడు. 2019 ఎన్నికల్లో జనసేన పార్టీ వామపక్షాలతో కలిసి పోటీ చేసి.. కేవలం ఒక్క సీటును మాత్రమే గెలుపొందాడు. భీమవరం, గాజువాక స్థానాల్లో పోటీ చేసి పవన్ ఓడిపోయాడు. టీడీపీతో పొత్తుతో 2024 ఎలక్షన్స్ బరిలోకి దిగనున్నట్లు ప్రకటించాడు. వ్యక్తిగత జీవితం: పవన్‌ కళ్యాణ్‌కు 1997లో నందీనితో వివాహం జరిగింది. 2007లో ఆమెకు విడాకులు ఇచ్చి హీరోయిన్ రేణు దేశాయ్‌ను వివాహం చేసుకున్నాడు. వీరికి ఇద్దరు పిల్లలు, అకీరానందన్, ఆద్యా. 2012లో వీరు విడిపోయారు. 2013 రష్యా మోడల్ అన్నా లెజినోవాను పెళ్లి చేసుకున్నాడు. వీరికి ఇద్దరు సంతానం, పాప పేరు పొలెనా అంజనా పవనోవా, తనయుడు మార్క్‌ శంకర్‌ పవనోవిచ్‌ అవార్డులు: గబ్బర్ సింగ్ చిత్రానికి గాను ఉత్తమ నటుడిగా సైమా అవార్డు అందుకున్నారు. 2001 ఏప్రిల్‌లో కూల్ డ్రింక్ కంపెనీ.. పెప్సీ పవన్‌ను తన బ్రాండ్ అంబాసిడర్‌గా ప్రకటించింది. ఆ తర్వాత ఆయన కొన్ని కారణాల వల్ల వాణిజ్య ప్రకటనల్లో నటించకూడదని నిర్ణయించుకున్నారు. 2017 జనవరిలో ఆంధ్రప్రదేశ్, తెలంగాణ రాష్ట్రాలలోని హ్యాండ్ లూమ్ నేత కార్మికులకు బ్రాండ్ అంబాసిడర్‌గా వ్యవహరించేందుకు ఒప్పుకున్నారు. 2017 నవంబరులో ఇండో-యూరపియన్ బిజినెస్ ఫోరమ్ నుంచి గ్లోబల్ ఎక్సెలెన్స్ పురస్కారం అందుకున్నారు. వ్యాపారాలు: పవన్ కళ్యాణ్.. అంజనా ప్రొడకన్స్, పవన్ కళ్యాణ్ క్రియేటివ్ వర్క్స్ బ్యానర్లపై సినిమాలను నిర్మిస్తున్నారు.