సమంత భారతీయ నటి. తెలుగు, తమిళ్, హిందీ భాషలలో ప్రధానంగా నటిస్తోంది. కెరీర్ ఆరంభంలో మోడలింగ్ చేసిన సమంత... గౌతమ్‌ మీనన్ డైరెక్షన్‌లో వచ్చిన 'ఏ మాయ చేశావే'(2010) చిత్రంతో తెలుగు చిత్ర సీమకు పరిచయమైంది. ఈ చిత్రంలో ఆమె నటనకు గాను విమర్శల ప్రశంసలు దక్కాయి. ఈ సినిమా బాక్సాఫీస్ వద్ద మంచి విజయం సాధించింది. దీంతో తెలుగులో ఆమెకు అవకాశాలు వెల్లువెత్తాయి. బృందావనం, దూకుడు (2011), ఈగ (2012), ఎటో వెళ్ళిపోయింది మనసు (2012), సీతమ్మ వాకిట్లో సిరిమల్లె చెట్టు (2013), అత్తారింటికి దారేది (2013), మనం(2014), మజిలి(2019), ఖుషి(2023) వంటి సూపర్ హిట్ చిత్రాలతో అతితక్కువ సమయంలోనే టాలీవుడ్‌లో స్టార్‌ హీరోయిన్‌గా ఎదిగింది. అటు సమంత హిందీ వెబ్-సిరీస్ ది ఫ్యామిలీ మ్యాన్ రెండవ సీజన్లో రాజీ పాత్రను పోషించింది. ఈ సిరీస్‌లో ఆమె నటనకు ఎంతో గుర్తింపు లభించింది. అవార్డులు: ఏ మాయ చేశావే చిత్రానికి గాను ఉత్తమ తొలి చిత్ర నటిగా ఫిల్మ్ ఫేర్ స్పెషల్ జ్యూరి అవార్డు, ఎటో వెళ్లిపోయింది మనసు చిత్రానికి గాను ఉత్తమనటిగా నంది పురస్కారం, అత్తారింటికి దారేది, ఓ బేబీ చిత్రాలకు గాను ఉత్తమ నటిగా సైమా పురస్కారాలు అందుకుంది. వ్యక్తిగత జీవితం: సమంతకు స్టార్ హీరో నాగచైతన్యతో 2017లో గోవాలో జరిగింది. వీరు టాలీవుడ్ స్టార్ కపుల్‌గా గుర్తింపు తెచ్చుకున్నారు. 4 ఏళ్ల వైవాహిక జీవితం అనంతరం వ్యక్తిగత కారణాలతో 2021లో విడిపోయారు. విడాకుల అనంతరం సమంత అనారోగ్య సమస్యలకు గురైంది. మయోసైటిస్ అనే వ్యాధితో కొన్ని రోజులు బాధపడింది. వ్యాధి నయం కావడంతో తిరిగి సినిమాల్లో నటిస్తోంది.