సిద్ధు జొన్నలగడ్డ తెలుగు సినిమా నటుడు. ఆయనకు నటుడిగానే కాకుండా రచయితగాను మంచి పేరుంది. ప్రవీణ్ సత్తారు దర్శకత్వంలో వచ్చిన ఎల్బీడబ్ల్యూ (లైఫ్ బిఫోర్ వెడ్డింగ్) సినిమాతో తెలుగు తెరకు పరిచయం అయ్యాడు. ఈ చిత్రానికి ముందు జోష్, ఆరంజ్, భీమిలి కబడ్డీ జట్టు సినిమాల్లో సహాయ పాత్రల్లో నటించాడు. గుంటూరు టాకీస్ చిత్రం ద్వారా గుర్తింపు పొందాడు. ఈ చిత్రానికి రచయితగా వ్యవహరించాడు. ఆ తర్వాత చాలా సినిమాల్లో నటించినప్పటికీ కమర్షియల్‌గా బ్రేక్ రాలేదు. అయితే 2022లో విడుదలైన డిజె టిల్లు సినిమా బాక్సాఫీస్ వద్ద సూపర్ హిట్‌గా నిలిచింది. ఈ చిత్రంతో సిద్ధు స్టార్ డం సంపాదించాడు. వ్యక్తిగత జీవితం: సిద్ధు హైదరాబాదులోనే పుట్టి పెరిగాడు. బీటెక్ పూర్తి చేసిన తర్వాత సినిమాల్లో నటిస్తూనే MBA పూర్తి చేశాడు. సిద్ధు తల్లి 25 సంవత్సరాలు ఆలిండియా రేడియోలో పనిచేసింది. తల్లితో కలిసి సంగీత కార్యక్రమాలకు వెళ్ళడం వలన సంగీతం మీద ఆసక్తి కలిగింది. సిద్ధు నాలుగేళ్ళపాటు తబలా నేర్చుకున్నాడు. ప్రభుదేవా స్ఫూర్తితో ఐదేళ్ళ పాటు డ్యాన్స్‌లోనూ శిక్షణ తీసుకున్నాడు.