ఆది సాయికుమార్ తెలుగు సినిమా నటుడు. ప్రముఖ నటుడు సాయి కుమార్ కుమారుడు. 2011 లో కె. విజయభాస్కర్ డైరెక్షన్‌లో వచ్చిన 'ప్రేమ కావాలి' చిత్రం ద్వారా ఆరంగేట్రం చేశాడు. ఈ సినిమా విమర్శకుల నుంచి మంచి ప్రశంసలు పొందడంతో ఆది యువనటుడిగా మంచి పేరు సంపాదించాడు. 2011లో దక్షిణాది ఫిలిం ఫేర్ అవార్డుల్లో ఉత్తమ నూతన నటుడిగా పురస్కారం అందుకున్నాడు. ఈ చిత్రం తర్వాత లవ్‌లీ (2012)సినిమాలో నటించాడు. ఈ చిత్రం బాక్సాఫీస్ వద్ద మంచి విజయం సాధించింది. ఆ తర్వాత సుకుమారుడు, చుట్టాలబ్బాయి, బుర్రకథ, శమంతకమణి వంటి హిట్ చిత్రాల్లో నటించి ప్రేక్షకులకు దగ్గరయ్యాడు.