తెలుగు చిత్ర పరిశ్రమలో నందమూరి తారాకరామారావు(NTR) లెజెండరీ నటులు. తెలుగులో 'మనదేశం'(1949) చిత్రం ద్వారా ఆరంగేట్రం చేశారు. ఆయన సినీ కెరీర్‌లో దాదాపు 300లకు పైగా సినిమాల్లో నటించారు. ఎన్టీఆర్ ప్రత్యేకించి శ్రీకృష్ణుడు, శ్రీరాముడు హిందూ దేవతల పాత్రలకు ప్రసిద్ధి చెందాడు. ఈ వేషాల్లో ఆయన నటనను చూసి అభిమానులు ఆయన్ను నిజంగా దేవుడిగా ఆరాధించేవారు. 'మాయాబజార్', 'నర్తనశాల', శ్రీకృష్ణార్జున యుద్ధం, లవకుశ, భూకైలాష్, దానవీరశూరకర్ణ వంటి పౌరాణిక చిత్రాల్లో ఆయన నటనకు విమర్శకుల ప్రశంసలు దక్కాయి. మిస్సమ్మ, గుండమ్మకథ, మల్లీశ్వరి, కన్యాశుల్కం, రక్తసంబంధం, వేటగాడు, జస్టిస్ చౌదరి, బొబ్బిలిపులి వంటి క్లాసిక్ చిత్రాల్లో ఆయన నటించిన తీరు తెలుగు సినిమాపై చెరగని ముద్ర వేసింది. ఆయన నటనకు మాత్రమే పరిమితం కాకుండా అనేక చిత్రాలకు డైరెక్షన్ చేయడంతో పాటు నిర్మించారు. విశ్వ విఖ్యాత నటసార్వభౌముడుగా బిరుదాంకితుడైన NTR మహాశయుడు తన 44 ఏళ్ళ సినిమా జీవితంలో 13 చారిత్రకాలు, 55 జానపద, 186 సాంఘిక, 44 పౌరాణిక చిత్రాలు చేశారు.