భారత్‌కు ఏమైంది? జట్టులో నిండా స్టార్ ఆటగాళ్లే. దేశవాలీ లీగుల్లో అద్భుత ప్రదర్శన చేసినవాళ్లే. రిజర్వ్ బెంచ్ కూడా పేపర్‌పై ఎంతో బలంగా ఉంది. ప్రస్తుతం ఉన్న ఆటగాళ్లతో భారత్ 3 జట్లను తయారు చేయొచ్చని చెబుతుంటారు. తీరా మైదానంలోకి దిగేసరికి పేరు గొప్ప ఊరు దిబ్బ అన్నట్లుగా పరిస్థితులు కనిపిస్తున్నాయి. తాజాగా వెస్టిండీస్‌తో సిరీస్‌లోనూ టీమ్‌ఇండియా చేతులెత్తేసింది. కారణాలు ఏమైనప్పటికీ, గత రెండేళ్లుగా భారత్ ఎన్నో కీలకమైన ఈవెంట్లను కోల్పోయింది. అవేంటో చూద్దాం.
WI vs IND T20I Series 2023
హార్దిక్ పాండ్యా నేతృత్వంలోని భారత జట్టు వెస్టిండీస్‌తో 5 మ్యాచ్‌ల టీ20 సిరీస్‌ని కోల్పోయింది. తొలి రెండు మ్యాచుల్లో ఓడినా.. 3, 4 టీ20ల్లో గెలిచి సిరీస్‌ని సమం చేసింది. ఆ తర్వాత కీలకమైన ఐదో టీ20లో చేతులెత్తేసింది. దీంతో 2–3 తేడాతో భారత్ సిరీస్‌ని చేజార్చుకుంది. ఇలా 5 మ్యాచుల టీ20 సిరీస్‌ని కోల్పోవడం భారత్‌కి ఇదే తొలిసారి.
WTC Final 2023, 2021
ఈ ఏడాది జూన్‌లో ఇంగ్లాండ్ వేదికగా జరిగిన ప్రపంచ టెస్ట్ ఛాంపియన్‌షిప్ ఫైనల్‌లో భారత్ ఓటమి చవిచూసింది. ప్రత్యర్థి ఆస్ట్రేలియాపై ఓటమిని మూటగట్టుకుంది. 2021లోనూ న్యూజిలాండ్‌పై టీమిండియా చేతులెత్తేసింది.
IND vs AUS ODI Series 2023
ఈ ఏడాది భారత పర్యటనకు వచ్చిన ఆస్ట్రేలియా వన్డే సిరీస్‌ని ఎగరేసుకు పోయింది. 3 మ్యాచ్‌ల వన్డే సిరీస్‌లో భాగంగా తొలి వన్డేని భారత్ గెలుచుకున్నప్పటికీ మిగతా రెండు వన్డేల్లో ఓటమిని చవిచూసింది. దీంతో సిరీస్ ఆసీస్ వశమైంది.
BAN vs IND ODI Series 2022
బంగ్లాదేశ్‌లో జరిగిన 3 వన్డేల సిరీస్‌ని భారత్ ఆదిలోనే కోల్పోయింది. తొలి రెండు వన్డేల్లో విజయం సాధించిన బంగ్లా సిరీస్‌ని కైవసం చేసుకుంది. నామమాత్రమైన చివరి వన్డేలో భారత్ 227 పరుగుల తేడాతో గెలిచి పరువు నిలబెట్టుకునే ప్రయత్నం చేసింది.
NZ vs IND ODI Series 2022
న్యూజిలాండ్ టూర్‌లో భారత్‌ను దురదృష్టం వెంటాడింది. 3 మ్యాచ్‌ల వన్డే సిరీస్‌లో భాగంగా తొలి వన్డేలో కివీస్ విజయం సాధించింది. ఆ తర్వాత మిగతా రెండు వన్డేలు జరగలేదు. వర్షం కారణంగా ఫలితం తేలలేదు.
ICC Mens T20 World Cup 2022
ఆస్ట్రేలియా ఆతిథ్యం ఇచ్చిన టీ20 వరల్డ్‌కప్‌లో భారత్ ఫైనల్ వరకు చేరుకోలేక పోయింది. సెమీఫైనల్‌లో ఇంగ్లాండ్ చేతిలో ఘోర పరాభవాన్ని ఎదుర్కొంది. ఇంటర్నేషనల్ ట్రోఫీ ఆశను మరోసారి నీరుగార్చింది.
Asia Cup Super Four Stage 2022
టీ20 వరల్డ్‌కప్‌కి ముందు జరిగిన ఆసియా కప్‌లో భారత్ నిరాశాజనకంగా ఆడింది. సూపర్-4 స్టేజిలో మూడో స్థానానికి పరిమితమై ఫైనల్‌కి అర్హత సాధించలేక పోయింది. సూపర్-4 తొలి రెండు మ్యాచుల్లో పాకిస్థాన్, శ్రీలంకలపై ఓడిపోయి ఇంటి ముఖం పట్టింది.
SA vs IND ODI, Test Series 2021-22
సౌతాఫ్రికా పర్యటనకు వెళ్లిన భారత్ టెస్టు, వన్డే సిరీస్‌లను గెలుచుకోలేక పోయింది. మూడు మ్యాచ్‌ల టెస్ట్ సిరీస్‌ని 1-2 తేడాతో భారత్ కోల్పోయింది. ఈ సిరీస్ అనంతరం జరిగిన వన్డే సిరీస్‌లోనూ ఘోర పరాభవం ఎదుర్కొంది. మూడు వన్డేలను సౌతాఫ్రికా క్లీన్ స్వీప్ చేసింది.
ICC Mens T20 World Cup 2021
దుబాయ్ వేదికగా జరిగిన టీ20 వరల్డ్‌కప్‌లో భారత్ గ్రూప్ దశలోనే వెనుదిరిగింది. పాకిస్థాన్, న్యూజిలాండ్ చేతిలో తొలి రెండు మ్యాచ్‌లను కోల్పోయింది. అనంతరం, మిగతా 3 మ్యాచ్‌లు గెలిచినా మూడో స్థానానికే పరిమితమైంది.
