శంకర్‌ దర్శకత్వంలో రామ్‌చరణ్‌ కథానాయకుడిగా రూపొందిన భారీ బడ్జెట్‌ చిత్రం ‘గేమ్ ఛేంజర్‌’ (Game Changer) గురించి తెలిసిందే. కియారా అడ్వాణీ కథానాయికగా, దిల్‌రాజు భారీ ఎత్తున నిర్మించిన ఈ సినిమా జనవరి 10న ప్రేక్షకుల ముందుకు రానుంది. తమన్‌ స్వరపరచిన ఈ సినిమా పాటలు ఇప్పటికే మంచి టాక్ సొంతం చేసుకున్నాయి. ప్రతి పాటను ఎంతో విశిష్టంగా రూపొందించడమే కాకుండా, వాటి విజువల్స్‌ ప్రేక్షకులపై చెరగని ముద్ర వేయనున్నాయి. ఈ ప్రత్యేక కథనంలో ఆ పాటల విశేషాలు, వాటి వెనుక ఆసక్తికర విషయాలను చూద్దాం.
1. ‘జరగండి..
ఈ సినిమా నుంచి విడుదలైన తొలి పాట ‘జరగండి.. జరగండి..’ గ్రాండ్‌ విజువల్స్‌తో అలరిస్తోంది. 70 అడుగుల ఎత్తయిన కొండ, గ్రామీణ వాతావరణంలో నిర్మించిన విలేజ్‌ సెట్‌లో ఈ పాటను షూట్‌ చేశారు. ప్రత్యేకత ఏమిటంటే, సెట్‌లో ఉపయోగించిన కాస్ట్యూమ్స్‌ సహా, ఇతర వస్తువులు పూర్తిగా పర్యావరణహితమైన జనపనారతో తయారు చేశారు. ప్రభుదేవా కొరియోగ్రఫీ చేసిన ఈ పాటలో 600 మంది డ్యాన్సర్లు పాల్గొన్నారు. 13 రోజుల పాటు జరిగిన చిత్రీకరణ సినిమాకు ప్రధాన ఆకర్షణగా నిలుస్తుందని భావిస్తున్నారు.
2. ‘రా మచ్చా
ఈ పాట యువతను విశేషంగా ఆకర్షిస్తోంది. గణేశ్‌ ఆచార్య కొరియోగ్రఫీ చేసిన ‘రా మచ్చా..’ పాటలో దేశంలోని వివిధ రాష్ట్రాలకు చెందిన 1000 మందికిపైగా జానపద కళాకారులు పాల్గొన్నారు. గుస్సాడీ (ఆదిలాబాద్‌), చావ్‌ (పశ్చిమ బెంగాల్‌), ఘూమ్రా (ఒడిశా), గోరవర (కర్ణాటక) వంటి ప్రాంతీయ నృత్యాలు ఇందులో హైలైట్‌గా నిలుస్తాయి. పాట విజువల్స్‌ గ్రాండ్‌గా ఉండేలా రూపొందించారు.
3. ‘నానా హైరానా..’
శంకర్‌ చిత్రాలకు తగినట్టు ఈ సినిమాకు కూడా సాంకేతికతలో కొత్తదనాన్ని చేర్చారు. ‘నానా హైరానా..’ పాటను తొలిసారి ఇన్ఫ్రారెడ్ కెమెరా ద్వారా చిత్రీకరించారు. న్యూజిలాండ్‌ అందమైన లొకేషన్లలో తీసిన ఈ మెలోడీ పాటకు మనీశ్‌ మల్హోత్ర కాస్ట్యూమ్స్‌ డిజైన్‌ చేశారు. ఆరు రోజుల పాటు సాగిన ఈ పాట చిత్రీకరణ వేదికపై అద్భుతంగా కనిపించనుంది.
4. ‘దోప్‌’
కరోనా సెకండ్‌ వేవ్‌ సమయంలో రష్యా నుంచి 100 మంది ప్రొఫెషనల్‌ డ్యాన్సర్లను ప్రత్యేక విమానంలో రప్పించి ‘దోప్‌’ పాటను రామోజీ ఫిల్మ్‌ సిటీలో 8 రోజుల్లో చిత్రీకరించారు. జానీ మాస్టర్‌ కొరియోగ్రఫీ చేసిన ఈ పాటకు కూడా మనీశ్‌ మల్హోత్ర డిజైన్‌ చేసిన కాస్ట్యూమ్స్‌ ఆకర్షణగా నిలిచాయి. ఈ పాట ప్రీ-రిలీజ్‌ ఈవెంట్‌లో విడుదలై సోషల్‌మీడియాలో సంచలనం సృష్టించింది.
5. థ్రిల్‌ పంచే ఐదో పాట
ప్రస్తుతం విడుదలైన నాలుగు పాటలు మాత్రమే ప్రేక్షకులకు అందుబాటులో ఉన్నాయి. ఐదో పాటను ప్రేక్షకులు సినిమాను చూస్తున్న సమయంలోనే అనుభవించనున్నారు. ఈ పాట సినిమా క్లైమాక్స్‌లో థ్రిల్‌ పంచుతుందని చిత్రబృందం వెల్లడించింది.
‘గేమ్ ఛేంజర్‌’ పాటలు సంగీతం, విజువల్స్‌, నృత్యాలతో ప్రత్యేకతను కలిగించి ప్రేక్షకుల మన్ననల్ని గెలుచుకునే విధంగా రూపుదిద్దుకున్నాయి. ప్రతి పాటకూ ఉన్న ప్రత్యేకత ఈ సినిమాను ప్రేక్షకుల్లో మరింత ఆసక్తికరంగా నిలపనుంది. జనవరి 10న ఈ సినిమా విడుదలైన తర్వాత ఈ పాటలు వెండితెరపై ఎలా ఆకట్టుకుంటాయో చూడాల్సిందే!
Celebrities Featured Articles Telugu Movies
Game Changer: ‘మేము మూలాలు మర్చిపోలే’.. బన్నీకి పవన్ చురకలు?