ఎమ్మెల్యేల కొనుగోలు కేసులో సిట్ దర్యాప్తు వేగవంతం చేసింది. భాజపా నేత బీఎల్ సంతోష్ సహా పలువురు సోమవారం విచారణకు రావాలని నోటీసులు పంపించినా గేర్హాజరయ్యారు. కరీంనగర్ కు చెందిన న్యాయవాది శ్రీనివాస్ మాత్రమే వచ్చారు. శ్రీనివాస్ ను సిట్ 8 గంటల పాటు ప్రశ్నించింది. నిందితుల్లో ఒకరైన సింహయాజులు తిరుపతి నుంచి హైదరాబాద్ వచ్చేందుకు శ్రీనివాస్ విమాన టికెట్ బుక్ చేసినట్లు ఆరోపణలున్నాయి. వారితో శ్రీనివాస్ కు ఉన్న సంబంధాలపై ఆరా తీసింది.

ఎమ్మెల్యేల కొనుగోలు కేసులో సిట్ అధికారులు విచారణ ముమ్మరం చేశారు. కేసుతో సంబంధం ఉందని భావిస్తున్న భాజపా జాతీయ ప్రధాన కార్యదర్శి బీఎల్ సంతోష్ కు నోటీసులు జారీ చేశారు. హైదరాబాద్ కమాండ్ కంట్రోల్ రూమ్ లోని సిట్ కార్యాలయంలో విచారణకు హాజరు కావాలని ఆదేశించారు. ఒకవేళ నోటీసులను బేఖాతరు చేస్తే అరెస్ట్ చేస్తామని వెల్లడించారు. నిన్న కరీంనగర్ కు చెందిన ఓ కీలక నేత బంధువుకు నోటీసులు ఇచ్చారు. వీరిద్దరిని ఒకే సమయానికి విచారిస్తారని తెలుస్తోంది.