కొలీజియంలో ఉన్నవాళ్లే ఆ వ్యవస్థపై వ్యాఖ్యలు చేయడం ఓ ఫ్యాషన్ అయిపోయిందని సుప్రీంకోర్టు వ్యాఖ్యానించింది. న్యాయమూర్తుల నియామకాలకి ప్రస్తుతం అనుసరిస్తున్న కొలీజియం వ్యవస్థను సమర్థించింది. దీనిపై మాజీ జడ్జీలు ఏదో అంటే తాము పట్టించుకోబోమని స్పష్టం చేసింది. దేశంలోనే అత్యంత పారదర్శక సంస్థల్లో సుప్రీంకోర్టు ఒకటని పేర్కొంది. 2018 డిసెంబర్ 12న జరిగిన కొలీజియం వివరాలు ఇవ్వాలని కోరుతూ ఆర్టీఐ ఉద్యమకారిణి పిటిషన్ విచారణ వేళ వ్యాఖ్యలు చేసింది.

ఎంపీలు, ఎమ్మెల్యేలు వంటి ప్రజాప్రతినిధులపై దాఖలైన క్రిమినల్ కేసులు తొలుత విచారణ చేపట్టాలని సుప్రీంకోర్టుకు అమికస్ క్యూరీ, సీనియర్ న్యాయవాది విజయ్ హన్సారియా నివేదించారు. ఐదేళ్లకు పైగా పెండింగ్ లో ఉన్నాయని.. అందుకే కింది కోర్టుల్లో వాటిని విచారించి.. తర్వాతే మిగతా కేసులు తీసుకోవాలన్నారు. కేసుల విచారణ వేగం చేయాలని దాఖలైన వ్యాజ్యంపై అమికస్ క్యూరీగా సుప్రీంకోర్టు నియమించగా..40 పేజీల నివేదికను సమర్పించారు. తెలంగాణతో పాటు 9 హైకోర్టులు వివరాలు పంపలేదన్నారు.