నందమూరి కుటుంబం నుంచి మరో నట వారసుడు ఇండస్ట్రీలో అడుగుపెట్టేందుకు సిద్ధమవుతున్నాడు. బాలకృష్ణ తనయుడు మోక్షజ్ఞ తేజ (Mokshagna Teja) త్వరలోనే హీరోగా తెరంగేట్రం చేయబోతున్నాడు. ఇప్పటికే అతడ్ని తెరపైకి తీసుకొచ్చే డైరెక్టర్ కూడా ఫిక్స్‌ అయిపోయినట్లు తెలుస్తోంది. అయితే గత కొంత కాలంగా మోక్షజ్ఞ తేజ లుక్స్‌కు సంబంధించి నందమూరి అభిమానుల్లో కాస్త ఆందోళనలో ఉంది. హీరో మెటీరియల్‌లా మోక్షజ్ఞ కనిపించడం లేదన్న వాదనలు నెట్టింట వినిపించాయి. ఓ వైపు సినిమా ఎంట్రీ గురించి వార్తలు వస్తున్నప్పటికీ మోక్షజ్ఞ తన ఫిజిక్‌పై ధ్యాస పెట్టకపోవడం నందమూరి ఫ్యాన్స్‌లో అసంతృప్తి కారణమైంది. ఈ క్రమంలో తాజాగా వచ్చిన మోక్షజ్ఞ లేటెస్ట్ ఫొటోలు.. అభిమానుల్లో ఒక్కసారిగా జోష్‌ నింపింది.
హ్యాండ్సమ్ లుక్‌లో..
నందమూరి మోక్షజ్ఞ హ్యాండ్సమ్ లుక్‌తో ఉన్న ఫొటోలు.. ఒక్కసారిగా నెట్టింట ప్రత్యక్షమయ్యాయి. ఇందులో మోక్షజ్ఞ.. తన హ్యాండ్సమ్ లుక్‌తో అందరినీ మెస్మరైజ్‌ చేశాడు. ఎవరూ ఊహించని విధంగా పూర్తి ఫిట్‌గా కనిపించి ఆశ్చర్యపరిచాడు. తాను పక్కా స్టార్ హీరో మెటీరియల్‌ అని తన న్యూ లుక్‌ ఫొటోలతో చాటిచెప్పాడు. ఇక మోక్షజ్ఞ లేటేస్ట్‌ చిత్రాలను చూసి నందమూరి ఫ్యాన్స్‌ తెగ ఖుషీ అవుతున్నారు. బాలకృష్ణ తనయుడు.. ఎలా ఉండాలని తాము ఊహించుకున్నామో మోక్షజ్ఞ అలాగే మేకోవర్‌ అయినట్లు కామెంట్స్ చేస్తున్నారు. మరో నందమూరి వారసుడు ఇండస్ట్రీలో అడుగు పెట్టేందుకు సమయం ఆసన్నమైందని పోస్టులు పెడుతున్నారు.
హనుమాన్‌ డైరెక్టర్‌తో ఎంట్రీ..!
నందమూరి వశం నుంచి వస్తోన్న మూడో తరం హీరో కావడంతో మోక్షజ్ఞ తేజను ఎవరూ ఇండస్ట్రీకి పరిచయం చేస్తారన్న ఆసక్తి ప్రతీ ఒక్కరిలోనూ నెలకొంది. అయితే లేటెస్ట్ బజ్‌ ప్రకారం.. ‘హనుమాన్‌’ ఫేమ్‌ ప్రశాంత్ వర్మ.. మోక్షజ్ఞ తేజ్‌ను ఇండస్ట్రీకి పరిచయం చేస్తాడని తెలుస్తోంది. ఇప్పటికే దీనిపై సోషల్‌ మీడియాలో జోరుగా ప్రచారం సాగుతోంది. అటు ప్రశాంత్ వర్మకు నటుడు బాలకృష్ణతో సన్నిహిత సంబంధాలు ఉన్నాయి. పైగా ‘హనుమాన్‌’ వంటి బ్లాక్‌ బాస్టర్‌తో ప్రశాంత్ ప్రతిభ ఏంటో దేశవ్యాప్తంగా అందరికీ తెలిసింది. యంగ్‌ డైరెక్టర్ కావడంతో పాటు.. తేజ సజ్జ వంటి కుర్ర హీరోతో పని చేసిన అనుభవం.. మోక్షజ్ఞ తేజకు కలిసొస్తుందని టాక్ వినిపిస్తోంది. అతడైతేనే మోక్షజ్ఞను సరిగ్గా హ్యాండిల్‌ చేయగలుగుతాడని నందమూరి ఫ్యాన్స్‌ కూడా నమ్ముతున్నారు. దీనిపై త్వరలోనే అధికారిక ప్రకటన కూడా ఉంటుందని ఇండస్ట్రీలో టాక్ ఉంది.
‘ఆదిత్య 369’ సీక్వెల్!
మోక్షజ్ఞ ఎంట్రీకి సంబంధించి ఓ వార్త గతంలో హల్‌చల్‌ చేసింది. బాలకృష్ణ సూపర్‌ హిట్‌ మూవీ ‘ఆదిత్య 369’ సీక్వెల్‌లో మోక్షజ్ఞ నటిస్తాడని ప్రచారం జరిగింది. దీనికి మాటల మాంత్రికుడు త్రివిక్రమ్‌ దర్శకత్వం వహిస్తారని కూడా టాక్ వినిపించింది. తాజాగా ప్రశాంత్ వర్మ డైరెక్టర్‌గా ఫిక్స్‌ అయినట్లు వార్తలు రావడంతో.. అతడు తీయబోయే సినిమా ‘ఆదిత్య 369’ సీక్వెల్ అయ్యుంటుందా? అని నందమూరి అభిమానులు ఆలోచనల్లో పడ్డారు. అదే నిజమైతే తమ ఆనందానికి అవధులు ఉండవని వారు అంటున్నారు. తన తండ్రి చేసిన ‘ఆదిత్య 369’ సినిమాతో మోక్షజ్ఞ ఇండస్ట్రీలోకి అడుగుపెడితే విజయం తథ్యమని అభిప్రాయపడుతున్నారు.
29 ఏళ్లకు తెరంగేట్రం!
తెలుగు సినీ పరిశ్రమలో అతి పెద్ద కుటుంబంగా నందమూరి వంశం ఉంది. ఆ కుటుంబం నుంచి వచ్చిన జూ.ఎన్టీఆర్‌.. టాలీవుడ్ అగ్రకథానాయకుల్లో ఒకరిగా కొనసాగుతున్నాడు. తారక్.. 17 ఏళ్లకే ‘నిన్ను చూడాలని’ సినిమాతో హీరోగా తెరంగేట్రం చేశాడు. అయితే ప్రస్తుతం మోక్షజ్ఞ వయసు 29 ఏళ్లు. తెలుగులో ఇంత లేటు వయసులో నట వారసుడిగా ఎంట్రీ ఇవ్వనున్న హీరో మోక్షజ్ఞనే కానున్నాడు. నిజానికి బాలకృష్ణ.. తన కుమారుడిని హీరో చేయాలని ఎప్పటి నుంచో ప్రయత్నాలు చేస్తున్నారు. అయితే శరీరాకృతి మార్చుకునే క్రమంలో మోక్షజ్ఞ ఎంట్రీ ఆలస్యమైంది. ఇన్నాళ్లకు హీరో మెటిరియల్‌గా మోక్షజ్ఞ లుక్‌ మారడం.. అభిమానులను సంతోషంలో ముంచెత్తుతోంది.
