లైగర్ పరాజయాన్ని చూసి బాధపడలేదని.. సినిమా చేస్తున్నంత కాలం చాలా ఎంజాయ్ చేశానని డైరెక్టర్ పూరీ జగన్నాథ్ చెప్పాడు. చిరంజీవిని ఇన్‌స్టాగ్రాంలో ఇంటర్వ్యూ చేసే సమయంలో తన మనసులో మాటని పూరీ పంచుకున్నాడు. శుక్రవారం సినిమా విడుదలైతే.. సోమవారం జిమ్‌కి వెళ్లి 100 స్క్వాట్లు తీశానని పూరీ చెప్పాడు. తరువాతి సినిమాకు మరింత బలంగా సన్నద్ధం కావడం కోసమే ఇలా చేశానన్నాడు. ఓటమి గురించి నెల రోజుల కంటే ఎక్కువగా ఆలోచించనన్నాడు. కాగా, భారీ అంచనాల మధ్య విడుదలై లైగర్ పరాజయాన్ని మూటగట్టుకుంది.

ప్రయోగాత్మక సినిమాలకు కేరాఫ్ అడ్రస్ ‘పూరీ జగన్నాథ్’. ఈ దర్శకుడిలో మంచి నటుడు ఉన్నాడని.. కెమెరా వెనకాలే కాకుండా తెరపై కూడా రాణించగలడని ఇండస్ట్రీలో చర్చ నడుస్తోంది. తాజాగా విడుదలైన ‘గాడ్‌ఫాదర్‌’లో జర్నలిస్టుగా పూరీ అదరగొట్టాడు. అంతకుముందు ఒకట్రెండు సినిమాల్లోనూ కాసేపు మెరిశారు. కానీ, చిరు సినిమాతో ఈ డైరెక్టర్ స్క్రీన్ పర్ఫార్మెన్స్ ఏంటో తెలిసిపోయిందని చెబుతున్నారు. దర్శకత్వంపైనే కాకుండా నటనపై కూడా దృష్టి సారించాలని పూరీకి సూచిస్తున్నారు. ప్రస్తుతం డైరెక్టర్‌గా పూరీ గడ్డు కాలం ఎదుర్కొంటున్న నేపథ్యంలో ఈ వాదన బలంగా వినిపిస్తోంది.