TS: మునుగోడు ఉపఎన్నిక బీజేపీ అభ్యర్థి రాజగోపాల్ రెడ్డిపై ఎన్నికల సంఘానికి టీఆర్ఎస్ పార్టీ ఫిర్యాదు చేసింది. రాజగోపాల్ రెడ్డికి కంపెనీ నుంచి వివిధ ఖాతాలకు భారీ మొత్తంలో డబ్బు ట్రాన్స్‌ఫర్ అయిందని ఆరోపించింది. ఓటర్లకు పంచేందుకు 23ఖాతాలకు రూ.5.22 కోట్లు బదిలీ అయ్యాయని ఫిర్యాదులో పేర్కొంది. డబ్బును విత్ డ్రా చేయకముందే లావాదేవీలను నిలిపివేయాలని కోరింది. వెంటనే తగిన చర్యలు తీసుకోవాలని విజ్ఞప్తి చేసింది. టీఆర్ఎస్ మంత్రి జగదీశ్ రెడ్డిపై ఈసీ ఆంక్షలు విధించిన అనంతరం టీఆర్ఎస్ ఫిర్యాదు చేయడం గమనార్హం.

TS: తమ పార్టీకి ఓటెయ్యకపోతే సంక్షేమ పథకాలను నిలిపివేస్తామని మంత్రి జగదీశ్ రెడ్డి వ్యాఖ్యలు చేయడంతోనే ఈసీ ఆంక్షలు విధించినట్లు తెలుస్తోంది. మునుగోడు ఉపఎన్నికల ప్రచారంలో భాగంగా ఈ వ్యాఖ్యలు చేశారు. దీనిపై వివరణ కోరగా.. మంత్రి సమాధానంపై ఈసీ అసంతృప్తి వ్యక్తం చేసింది. దీంతో ఆయనపై ఆంక్షలు విధిస్తూ ప్రకటించింది. కాగా, టీఆర్ఎస్ పార్టీ రేపు చండూరులో నిర్వహించబోయే భారీ బహిరంగ సభకు మంత్రి జగదీశ్ రెడ్డి దూరం కానున్నారు. ప్రచారంలో జగదీశ్ రెడ్డి మొదటినుంచీ కీలకంగా ఉంటున్నారు.