హిండెన్‌బర్గ్‌ నివేదికతో అదానీ గ్రూప్ షేర్ల విలువ సగానికి పడిపోయినట్లు తెలుస్తోంది. దాదాపు 120 బిలియన్ డాలర్ల నష్టపోయినట్లు సమాచారం. గతకొన్ని రోజులుగా స్టాక్‌ మార్కెట్‌లో అదానీ కంపెనీకి చెందిన షేర్లను విక్రయించడానికి మదుపర్లు ఆసక్తి చూపుతున్నారు. ఫలితంగా అదానీ ఎంటర్‌ప్రైజెస్ దాదాపు 30 శాతం పతనమయ్యింది. అదానీ గ్రీన్, పవర్, ఎనర్జీ , గ్యాస్‌కు సంబంధించి కూడా ఇదే పరిస్థితిలో ఉన్నాయి. ఈ సంస్థ అవకతవకలపై హిండెన్ బర్గ్‌ నివేదిక ఇవ్వటం సంచలనం రేపిన సంగతి తెలిసిందే.

హిండెన్‌ బర్గ్‌ రీసెర్చ్‌ ఆరోపణలతో అదానీ గ్రూప్‌ షేర్లు కుప్పకూలుతున్నాయి. ఇవాళ కూడా అదానీ గ్రూప్‌ షేర్లను విక్రయించేందుకు మదుపర్లు ఆసక్తి చూపారు. దీంతో చాలా కంపెనీల షేర్లు వాటి సంబంధిత లోయర్ సర్క్యూట్‌ను తాకాయి. దీంతో గతవారం రోజులుగా అదానీ గ్రూప్ మార్కెట్‌ విలువలో దాదాపు రూ.7.44 లక్షల కోట్లు నష్టపోయింది. అదానీ ఎంటర్‌ప్రైజెస్‌ షేర్ విలువ దాదాపు 8.58 శాతం పడిపోయింది. అదానీ ట్రాన్స్‌ మిషన్, పవర్, విల్మార్ కూడా దారుణంగా పతనమయ్యాయి.