మునుగోడులో గెలుపుతో తెరాస నేతలు అహంకారంతో మాట్లాడుతున్నారని భాజపా రాష్ట్ర అధ్యక్షుడు బండి సంజయ్‌ విమర్శించారు. రాజగోపాల్‌ రెడ్డి రాజీనామా చేసి వస్తే ప్రజాతీర్పు కోరామని…12 మంది ఎమ్మెల్యేలను అక్రమంగా లాక్కున్న కేసీఆర్‌ వారితో రాజీనామా చేయించాలని డిమాండ్‌ చేశారు. ఉపఎన్నికలకు తాము సిద్ధంగా ఉన్నామని వ్యాఖ్యానించారు. మంత్రులు, ఎమ్మెల్యేలు నియోజకవర్గంలో పాగా వేసి ఓటుకు రూ. 10 వేలు పంచారని ఆరోపించారు. అయినా.. తెరాసకు వచ్చిన మెజార్టీ 11 వేలే అన్నారు.

మునుగోడు ఉపఎన్నిక ఫలితాల వెల్లడిలో సీఈఓ వికాస్ రాజ్ తీరు అనుమానస్పదంగా ఉందని భాజపా రాష్ట్ర అధ్యక్షుడు బండి సంజయ్ ఆరోపించారు. తెరాస ఆధిక్యంలోకి వస్తే తప్పా ఫలితాలు ఇవ్వడం లేదన్నారు. భాజపా లీడింగ్ లోకి వచ్చినా చెప్పట్లేదని పేర్కొన్నారు.మెుదటి రౌండ్ తర్వాత మూడు, నాలుగు రౌండ్ల ఫలితాలు చెప్పేందుకు ఎందుకు ఆలస్యం చేశారో చెప్పాలని డిమాండ్ చేశారు. ఫలితాల్లో ఏమాత్రం పొరపాటు జరిగినా కేంద్ర ఎన్నికల సంఘానికి ఫిర్యాదు చేస్తామని చెప్పారు.