రైల్వే ప్రయాణికులకు గుడ్ న్యూస్

ప్రయాణికులకు భారత రైల్వే శాఖ గుడ్ న్యూస్ చెప్పింది. ఈ వేసవిలో తక్కువ ధరకే ఏసీ ప్రయాణ సౌకర్యం కల్పించబోతుంది. ఈ నెల 22 నుంచి ఏసీ-3 టైర్ ఎకానమీ క్లాస్ టికెట్ ధరలు తగ్గిస్తూ నిర్ణయం తీసుకుంది. అంతేకాకుండా ప్రయాణికులకు దుప్పట్లు కూడా అందించనుంది. ఈ మేరకు రైల్వే శాఖ ఉత్తర్వులు మంజూరు చేసింది.ఇప్పటికే రిజర్వేషన్ చేసుకున్న వారికి రీఫండ్ ఇస్తామని ప్రకటించింది. కౌంటర్లలో టికెట్ బుక్ చేసుకున్న వారికి రైల్వే స్టేషన్ కౌంటర్లలో రీఫండ్ అందించనున్నట్లు తెలిపింది.

రైల్వే ప్రయాణికులకు అత్యుత్తమమైన చౌకైన ఏసీ ప్రయాణం అందించడానికి భారతీయ రైల్వే త్రీ టైర్ ఎకానమీ కోచ్‌లను ప్రవేశపెట్టింది. ఇతర రైళ్లలో సాధారణ ఏసీ 3 టైర్‌ కోచ్‌ల కన్నా 3 టైర్‌ ఎకానమీ ఛార్జీలు చాలా తక్కువ. ఇందులోనూ తగ్గిస్తుండటం ప్రయాణికులకు కలిసొచ్చే విషయం. 

గతసంవత్సరం జారీ చేసిన సర్క్యూలర్ ప్రకారం…. AC-3 టైర్ టికెట్ ధరతో సమానంగా 3 టైర్ ఎకానమీ రేట్లు ఉంటాయని నిర్ణయించారు. కానీ, ప్రయాణికులకు తక్కువ ధరకు ఏసీ ప్రయాణాన్ని కల్పించడం రైల్వే లక్ష్యం. అందుకే రేట్లను తగ్గిస్తున్నట్లు అధికారులు వెల్లడించారు. ఈ ఏసీ 3 టైర్ ఎకానమీ బోగీలను 2021 సెప్టెంబర్‌లో అందుబాటులోకీ వచ్చాయి. ప్రవేశపెట్టిన ఏడాదిలోనే రూ. 231 కోట్ల ఆదాయాన్ని ఆర్జించింది.